"चल दोस्ता तुला "बीड जिल्हा " दाखवतो " कोणी लिहिलं माहित नाही परंतु काळजाला भिडणारे आहे .एकदा वाचा सत्य समोर ..

  कोरडा डोळा, कोरडी विहीर
कोरड्या राजकारण्यांचे, कोरडे संदर्भ दाखवतो

"चल दोस्ता तुला " बीड जिल्हा " दाखवतो " ।।1।।

वावरात शेतकऱ्याची सत्ता नाही,

विहिरीत पाण्याचा पत्ता नाही,

पाच वर्षा पासुन, कनेक्शन साठी केलेला अर्ज दाखवतो

"चल दोस्ता तुला "बीड जिल्हा " दाखवतो " ।।2।।

या वर्षी वावरात, पिकांची शाळाच नाही डवरली,

कि निसर्गानं वावराची, फी च नाही भरली,

अनुपस्थित पिकांचा, सुनसान वर्ग दाखवतो

"चल दोस्ता तुला "बीड जिल्हा " दाखवतो " ।।3।।

बिजवाई घेतली तं, खताची असते उधारी

पोराला शिकोलं तं, पोरगी राह्यते कोरी

दुःखाचा तं उकळा रोज, सुख वर्ज्य दाखवतो

"चल दोस्ता तुला "बीड जिल्हा" दाखवतो " ।।4।।

असे उसने आयुष्य जगण्याचा, फायदा तरी काय,

एंड्रिन च्या दुकानाकडे, आपोआप वळतात मग पाय,

जहर खाण्यासाठीही, काढलेलं कर्ज दाखवतो

चल दोस्ता तुला "बीड जिल्हा " दाखवतो ।।5।।

योजना नको सांत्वन नको, नकोच करू हाऊस

देवा तू फक्त वेळेवर, पाडत जा पाऊस

माझ्या डोळ्यात लपवलेला मग, निसर्ग दाखवतो

"चल दोस्ता तुला "बीड जिल्हा " दाखवतो